လွင်ႈတၢင်းႁၵ်ႉမဵတ်ႉတႃႇ လႄႈ ပၢႆးယူႇလီ

တွၼ်ႈတႃႇၸၢတ်ႈပၢၼ်ၽဝလႄႈ ႁိမ်းႁွမ်းႁဝ်းပေႃးတေႁၢင်ႈလီ မူၼ်ႈသိူဝ်းလႆႈၼၼ်ႉ လွင်ႈတၢင်းႁၵ်ႉမဵတ်ႉတႃႇၼႆႉ တိုၼ်းလွင်ႈယႂ်ႇတႃႇၵူၼ်းၵူႈၵေႃႉယဝ်ႉ။ ၵူၼ်းႁဝ်းၵူႈၵေႃႉ ဢမ်ႇဝႄႈလွတ်ႈလႆႈ လွင်ႈတၢင်းႁၵ်ႉမဵတ်ႉတႃႇၼႆႉလႆႈ ဢမ်ႇဝၼ်းၼိုင်ႈဝၼ်းၼိုင်ႈတေထူပ်းၺႃး လွင်ႈတၢင်းႁၵ်ႉၼႆႉယူႇယဝ်ႉ။

တၢင်းႁၵ်ႉဢၼ်ဝႃႈၼႆႉ ၵူၼ်းႁဝ်းၵူႈၸိူဝ်းꧦ ပိုတ်ႇတီႈပွင်ႇမၼ်းဝႆႉၵူႈၸိူဝ်းꧦ မိူၼ်ၼင်ႇႁဝ်းႁၵ်ႉ ပေႃႈႁၵ်ႉမႄႈ ႁၵ်ႉပီႈၼွင်ႉၸိူဝ်ႉၶိူဝ်းဝၢၼ်ႈမိူင်းၸဝ်ႈၵဝ်ႇ ႁၵ်ႉဢူၺ်းၵေႃႉ ႁၵ်ႉၵေႃႉႁၵ်ႉ (ၸုၸူဝ်း) ၸိူဝ်းၼႆႉ ပၼ်ႁႂ်ႈႁဝ်း မီးတၢင်းမူၼ်ႈသိူဝ်းၵတ်းယဵၼ်လႆႈ ထိုင်တီႈႁဝ်းလၢတ်ႈ ဢွၵ်ႇမွၵ်ႇၼႄ ပေႃးဢမ်ႇလႆႈယဝ်ႉ။ လွင်ႈႁၵ်ႉၼႆႉ မေႃယႃလူင်ၶဝ်ပိုတ်ႇၼႄဝႆႉဝႃႈ ပေႃးလႆႈႁၵ်ႉမႅၼ်ႈဝႆႉမဵတ်ႇတႃႇၼိူဝ်သေၵေႃႉꧦၼႆ ႁဵတ်းႁႂ်ႈၸႂ်ဢူၼ်ႈၼူၼ်း လီလႄႈ မီးလွင်ႈၸႂ်ၵတ်းယဵၼ်တူဝ်ၵတ်းယဵၼ် ႁဵတ်းႁႂ်ႈတၢင်းပဵၼ်ပၢႆးၸႂ် ၸုတ်ႈယွမ်းပိူင်ၼိုင်ႈၼႆယူႇ။ ၵေႃႉလႆႈႁၵ်ႉလႄႈ ၵေႃႉလႆႈၶၢမ်ႇတၢင်းႁဝ်းႁၵ်ႉၶဝ်ၼၼ်ႉၵေႃႈ မီးလွင်ႈမူၼ်ႈသိူဝ်းၼင်ႇၵၼ် လႄႈ မီးလွင်ႈ တူဝ်ၵတ်းယဵၼ်ၸႂ်ၵတ်းယဵၼ် ၼင်ႇၵၼ်သေ ၵႅတ်ႇၶႄပၼ် တၢင်းပဵၼ်လႆႈ လၢႆလၢႆမဵဝ်း ၼႆယဝ်ႉ။

ၽေႈတိုၼ်းမဵတ်ႉတႃႇၽဝၼႃႇ ဝႆႉၸႂ်မဵတ်ႉတႃႇ ႁၵ်ႉၼိူဝ်ၽီသၢင်သတ်းၵူၼ်းၵေႃႈ တိုၼ်းႁၼ်လွင်ႈၵတ်းယဵၼ် လွတ်ႈၵၢင်းၶဵၼ် ၸၢတ်ႈၼႆႉၸၢတ်ႈၼႃႈဢမ်ႇႁၢင်ႉၼႆ ၼႂ်းထမ်ႇမၵေႃႈၸႅင်ႈလႅင်းဝႆႉယူႇယဝ်ႉ သင်ဝႃႈ ဢဝ်ၸႂ်လေႃးၽ ၶႂ်ႈလႆႈၶႂ်ပဵၼ်သေႁၵ်ႉ ပႃးလွင်ႈၶႅၼ်သီးသေႁၵ်ႉ လေႃးၼႆ ႁုၵႃႈတေလႆႈပႃး လွင်ႈလိူတ်ႇ ႁွၼ်ႉမႆႈၸႂ် ၶီၸႂ်ၶမ်ၸႂ်မႃးယူႇ။ ပေႃးမေႃဢဝ်ၸႂ်မဵတ်ႉတႃႇသေႁၵ်ႉ ပေႃးလႆႈႁၵ်ႉယူႇၵေႃႈပေႃးယဝ်ႉၼႆ ဢဝ်ၸႂ်မဵတ်ႉတႃႇသေ ႁၵ်ႉၸိုၼ်ႈꧦသႂ်ꧦ ၼႆၸိုင် တိုၼ်းပၼ်တႃႇပၢႆးယူႇလီ မႃးတႄႉတႄႉယဝ်ႉ။

တၢင်းႁၵ်ႉၼႆႉႁဵတ်းႁိုဝ်ပဵၼ်တႃႇပၢႆးယူႇလီ- တၢင်းႁၵ်ႉၼႆႉ ဢမ်ႇမေႃထဝ်ႈ (ႁၢင်ႈၽၢင်ဢမ်ႇလု) တၢင်းႁၵ်ႉၼႆႉ ၸၢင်ႈႁႂ်ႈဢႃႇယုယိုၼ်းယၢဝ်း တၢင်းႁၵ်ႉၼႆႉ ၸၢင်ႈႁႂ်ႈဢဵၼ်ႁႅင်းၵႅၼ်ႇၶႅင်မႃး တၢင်းႁၵ်ႉၼႆႉ ၸၢင်ႈၵႅတ်ႇၶႄပၼ် တၢင်းပဵၼ်လိူတ်ႈၶိုၼ်ႈလိူတ်ႈလိူဝ် တၢင်းႁၵ်ႉၼႆႉ ၸၢင်ႈႁႂ်ႈႁူဝ်ၸႂ် ၸိုၼ်ႈသႂ်မႃး တၢင်းႁၵ်ႉၼႆႉ ၸၢင်ႈႁႂ်ႈ ၺၢၼ်ႇ တၢင်းဝူၼ်ႉလီမႃး တၢင်းႁၵ်ႉၼႆႉ ၸၢင်ႈႁႂ်ႈၸႂ်သုၵ်ႉသၢၵ်ႉ ၼၼ်ႉပၢင်ႇမႃး တၢင်းႁၵ်ႉၼႆႉ ၸၢင်ႈႁႂ်ႈၸႂ် ၶႂ်ႈလႆႈ (လေႃးၽ) ၼၼ်ႉဢေႇမၢင်မႃး တၢင်းႁၵ်ႉၼႆႉ ၸၢင်ႈႁဵတ်းႁႂ်ႈတၢင်းယၢမ်ႈပၢႆးယူႇလီ ၵူၼ်းႁဝ်းလီမႃး ဝႃႈၼႆယဝ်ႉႉႉႉ ပိူင်လူင်မၼ်းတႄႉလူဝ်ႇမေႃဝႆႉၸႂ်မဵတ်ႉတႃႇၸိုၼ်ႈꧦသႂ်ꧦ သေႁၵ်ႉၵူၺ်း သင်သမ်ႉပႃးဝႆႉလွင်ႈၶႂ်ႈ လႆႈလေႃးၽ လွင်ႈလိူတ်ႇႁွၼ်ႉမႆႈၸႂ်သေႁၵ်ႉၼႆ ႁုၵႃႈတေလႆႈလိူတ်ႇမႆႈ ပဵၼ်ထႅင်ႈၶဵၼ်ႁူဝ်ၸႂ်ႁဝ်းၶိုၼ်းၵူၺ်း ၵွပ်ႈၼႆႁႂ်ႈမေႃယူႇလူၺ်ႈတၢင်းႁၵ်ႉမဵတ်ႉတႃႇ ၸိုၼ်ႈသႂ်သေ ႁႂ်ႈလႆႈယူႇလူၺ်ႈ တူဝ်ၵတ်းယဵၼ် ၸႂ်ၵတ်းယဵၼ် လွတ်ႈတၢင်းပဵၼ် ၵပ်းၵၢႆႇလူၺ်ႈၸႂ်ၼႆႉၵူႈၵေႃႉသေႉႉႉႉ

ၸွမ်းလႅင်း (သၢႆၼမ်ႉတၢင်ႈ)