ၵၢၼ်လဵပ်ႈႁဵၼ်း ဢမ်ႇၼၼ် လွင်ႈႁဵၼ်းတၢင်းႁူႉတၢင်းႁၼ်ၼၼ်ႉ ၶိုၵ်ႉၶမ်ႇတႃႇၵူၼ်းႁဝ်းသေတႃႉ ၵၢၼ်တူဝ် ထူပ်းၼႆႉ ယိုင်ႈၶႅၼ်းၶိုၵ်ႉတွၼ်းလိူဝ်ပိူၼ်ႈယဝ်ႉ။ မီးၵၢၼ်လဵပ်ႈႁဵၼ်းႁူႉမေႃယႂ်ႇၼမ်တၢၼ်ႇႁိုဝ်ၵေႃႈယဝ်ႉ ပေႃး ယင်းဢမ်ႇမီးလွင်ႈတူဝ်ထူပ်းၸိုင် မိူၼ်ၵၼ်တင်းမေႃယႃ ႁဵၼ်းႁူႉလၢႆးယႃမၼ်း လၢႆလၢႆၵူၺ်းလႄႈ ဢမ်ႇႁူႉ တၢင်းပဵၼ်ၼၼ်ႉ တေပေႃႇပဵၼ်မႃးၸိူင်ႉႁိုဝ်လၢႆးလႂ်။
ၵူၼ်းသိုၵ်းဢၼ်လႆႈၽိုၵ်းၵၢၼ်ဝႆႉလၢႆလၢႆလႄႈ ပႆႇတွၼ်ႉယၢမ်ႈလႆႈတိုၵ်းၼၼ်ႉ တေဢမ်ႇပေႃးႁူႉလၢႆးသိုၵ်းလီလီ၊ ၵူၼ်းလဵၼ်ႈၵၢၼ်မိူင်း ၵူၼ်းပႃးဝႃႇသၼႃႇၵၢၼ်မိူင်းၶဝ်ၵေႃႈ ၵွမ်ႉၵႃႈလဵပ်ႈႁဵၼ်းႁူႉမႃးၼႂ်းပပ်ႉၼႂ်းၽိုၼ်ၽႂ် ႁူႉ လွင်ႈၵၢၼ်မိူင်းလုမ်ႈၾႃႉ ဢၼ်ပိူၼ်ႈႁဵတ်းပူၼ်ႉၵႂႃႇၼၼ်ႉသေ ဢဝ်မႃးဢုပ်ႇၼႄၵၼ်ယူႇပၢပ်ႉပၢပ်ႉ ၼႆႉၵေႃႈ ပႆႇလႆႈဝႃႈ ႁူႉလွင်ႈပွင်ႇၸႂ်ၼႂ်းၵၢၼ်ပၢႆးမိူင်းၼင်ႇၵဝ်ႇ။
လွင်ႈၵၢၼ်ၸိူဝ်ႉၸၢတ်ႈ ၸိုင်ႈမိူင်း ၾိင်ႈၶိူဝ်း တီႈၵိူဝ်းလီ ၸၵႂႃႇ ၸိူဝ်းၼၼ်ႉၵေႃႈ ပေႃးဢမ်ႇမေႃႁဵတ်း ဢမ်ႇၼၼ် မေႃယူႇသမ်ႉဢမ်ႇၶႂ်ႈႁဵတ်း ဢမ်ႇၼၼ် ၶႂ်ႈႁဵတ်းယူႇ ယၢမ်းဢၼ်ၶႂ်ႈႁဵတ်းၼၼ်ႉသမ်ႉပႆႇထိုင်လႄႈ ၸင်ႇဝႃႈ ယူႇပႂ်ႉ တၢင်းၼွၵ်ႈသေဢုပ်ႇသေႉၵႄႉယႄႉ ထဵင်ၵၼ်ယူႇလွၵ်ႇလွၵ်ႇလၢႆလၢႆ ၵွႆပၢႆဝၢႆးမႃးသမ်ႉဢမ်ႇမေႃဝူၼ်ႉမႄး ၵူၺ်းမေႃ သေႉၼေးလေးႁမ်ၵမ်ၶွင်ပိူၼ်ႈတၢင်ႇၸၢတ်ႈၵူၺ်းတႄႉ ပႆႇလႆႈဝႃႈပဵၼ်ၽူႈဢၼ်တူဝ်ထူပ်း ၼႂ်းၵၢၼ်ၸိူဝ်ႉၸၢတ်ႈ ၸိုင်ႈမိူင်းသင်။
ဢၼ်ၵႆႉလႆႈႁၼ်တႆးႁဝ်းၼႆႉ ၵႂႃႇတီႈလႂ်ယူႇတီႈလႂ်ဢမ်ႇဝႃႈ ပေႃးၼင်ႈပၼ်ႇပၢင်ၵၼ်ၵေႃႈ ၵႆႉၵႆႉဢုပ်ႇၵၼ် ၶိူဝ်းၵၢၼ် မိူင်းၵၢၼ်သိုၵ်းလွၼ်ႉလွၼ်ႉ ၵူၺ်းၵႃႈ ၵူၼ်းဢၼ်ၶဝ်ႈလဵၼ်ႈတူဝ်ထူပ်းၼႂ်းၵၢၼ်မိူင်း ၵၢၼ်သိုၵ်းတႄႉတႄႉ ၼၼ်ႉ တႄႉ ဢမ်ႇမီးလႄႈ ၵူၼ်းဢၼ်ႁူႉၵၢၼ်မိူင်းတႄႉတႄႉၵေႃႈဢမ်ႇမီး ၵူၺ်းမီးၵူၼ်းဢုပ်ႇၵၢၼ်မိူင်းၵၢၼ်သိုၵ်း လၢႆလၢႆၵူၺ်း၊ ပေႃးတေဝႃႈဢုပ်ႇဢဝ်လၢႆလၢႆလႄႈလႆႈလီလႆႈပဵၼ်ၵႂႃႇၼႆတႄႉ တိုၼ်းတေဢမ်ႇမီးၽႂ်ၶႂ်ႈႁဵတ်းၵၢၼ် မိူင်း ၵၢၼ်သိုၵ်းၵွၼ်ႇလႃႈ။
တႆးႁဝ်းၼႆႉ ၵွပ်ႈၵႆႉဢုပ်ႇလူမ်းၽူင်ႉလၢႆလၢႆၵူၺ်းၼၼ်ႉၼႃႇ ၸင်ႇဝႃႈမိူင်းႁဝ်းပဵၼ်ၸိုင်ႈမိူင်းမၢၵ်ႈမီးသေတႃႉၵေႃႈ မိူၼ်တင်းဝႃႈဢမ်ႇမီးသင် ပေႃးတေဝႃႈပွတ်းပွတ်းၵေႃႈၽၢၼ်ၼၼ်ႉယဝ်ႉ၊ ယိုင်ႈႁဝ်းၽၢၼ်ႁဝ်းသမ်ႉတေၵုမ်ႇ ၼွၼ်းၼူၵ်ႇပူၵ်းၵၼ်ယၢပ်ႇယူႇႁဵတ်းၼႆတိၵ်းတိၵ်းႁႃႉ။
ဢိူဝ်ႈႉႉႉ တႄႇၼႆႉၵႂႃႇ ယႃႇပေၵုမ်ႇမိုင်ႉဢုပ်ႇၼႄၵၼ်လၢႆလၢႆၵူၺ်း လူဝ်ႇလႆႈႁဵတ်းၼႄၼမ်ႉၼႄတူဝ်မၼ်းလူးၵွၼ်ႇ ၸွင်ႇတေပဵၼ်ၽွၼ်းလီတေႃႇၸိူဝ်ႉၸၢတ်ႈၸိုင်ႈမိူင်းႁဝ်းလႄႈ ၸင်ႇတေလႆႈဝႃႈတူဝ်ထူပ်းတႄႉယဝ်ႉ။
သိူဝ်သႅၼ်ႇသဵင်
ဢိင်ဢဝ်ၼႂ်းပပ်ႉသႅင်တဵၼ်း မၢႆသၢမ် ၼၼ်ႉသေ
မႃးသိုပ်ႇတၢင်ႇၼႄပီႈၼွင်ႉႁဝ်းၶဝ်
မိူင်းတၢင်ႈၶမ်း